2015 - 闖西藏
<![if !vml]>
<![endif]>
裝備、行程計劃
藥物及個人護理
去西藏最擔心既就係高反，去之前睇過唔少高反的 blog 和文章，我地幾條中年麻甩老實講就算個口幾硬都好，都總會有點擔心。所以在藥物準備上，都預多唔敢預少，必理痛 (1日最多食4粒，去15日，5個人，預了300粒，起碼如果人人日日都要狂啪 panadol 的話都剛剛好夠)、傷風感冒藥當然少不了、喇叭牌正露丸、胃仙U、速治靈、銀翹、牛黃解毒片，總之諗到乜就帶乜。而高反藥方面，有隊友臨行前食紅景天，而我就食西醫海拔適。
準備還準備，實際情況係點呢？我地5個加埋2個併車女，一D高反都冇。我自己在HK臨出發前一日食左一粒海拔適，但因為成日要痾尿，好麻煩，食了一粒就冇食，到上珠峰及納木措前又食了一粒，總共就食過三粒，買就買左成30粒預15日，嘥晒D $$。
幾百粒必理痛咁多個人咁多日食唔夠20粒......
如果擔心會感冒發燒，可早上或臨訓前就算冇病冇痛都啪定兩粒 panadol，當補品好當買左唔好嘥又好。
其餘藥品，touch wood講句，帶幾多去帶返幾多返HK....good luck！
有幾樣野不妨帶多D，大塊的膠布，退熱貼 (可以在酒店送俾D囡囡用，隨時感恩圖報以身相許)、曼秀雷敦 (如果有鼻敏感，簡直係神藥)，龍角散(乾燥又成日食藏餐，喉嚨好易痛)。註:西藏食野絕不清淡，感覺上幾重味精。
有D野可以唔帶，例如口罩，西藏廁所和風沙確係難頂，不過既然已有頸巾或圍巾，已足夠你遮晒成塊面，口罩就慳返。
太陽油不可少，潤膚膏(我地呢D麻甩佬只要唔爆察就ok，萬寧有隻$13大大樽既潤膚膏，臨訓前大大躄擦全身，夠十幾日用，又平又正)。
有一樣野好緊要 ----- 夏桑菊，係咪潤喉解熱唔知道，但唔想飲咁多可樂又嫌清水太清，夏桑菊是最佳良伴，基本上是惟一帶咁多用咁多既東西。
其餘的東西，網上好多西藏遊記都有不同建議，老老實實，如果照足咁帶，有點多餘又有點浪費。雖則話小心駛得萬年船，有備無患是對的，但如果立立雜雜帶了一大堆唔等駛既野，每日換酒店執行李都幾煩幾on居。
睡袋，我地5個人都有帶睡袋，結果是一日都冇用過。冇錯，珠峰、納木措住宿條件係差，但未至於訓街，被鋪確係會有陣味，不過每日玩到咁夜，污穢D一日半日有乜所謂，總好過攞個睡袋出來第2日又收返埋咁麻煩。(我個睡袋同件羽絨本來就打算唔帶返HK，最後送了給人)。
反而頸枕好有用，長途車嘛。另類用法，將個頸枕放車頭曬一個鐘，然後放頸後，好似熱石按摩咁正。
行山仗 -- it's a must, Must, MUST!!!!!!!!!!
衣服
短袖衫唔需要帶太多，反而長袖衫帶多幾件，並不是保暖而係為影相，我長袖衫只係帶了兩件，唔係話凍，係嫌影相唔夠多花款囉。羽絨和 jacket 一定要帶，最緊要鮮色，紅色最好，影相夠sharp。有$就買gore tex貪佢防水又透氣，不過冇都冇所謂。
西藏莫講話每個月，每日既天氣變化都好大，如果去10日，最好預5日衣服，突然好凍都可以著晒上身。西藏遊衣服最緊要外面鮮色，裡面著多兩件底衫打靚個底冇人會笑你。
內衣褲方面，好多地方都可以洗衫，掛天台唔駛兩個鐘包乾，自己洗吧。或者好似我咁，一早預備唔要既底衫褲同襪、T恤，爛鬼褲，著到邊掉到邊，最後行李free出來的地方就放記念品。
帶了雨衣，好彩，冇用過。都係嗰句，西藏天氣變化大，唔同月份去都有不同準備，不能一概而論。但重點是，唔好過份緊張，好似Kelvin咁，個喼係佢女友執既，裡面有4件羽絨......
食物
好多blog都叫人帶大量零食，唔知仲以為佢地係超市sales。其實，去到邊到旅行，應試試當地食品，未必一定HK口味，不過旅行係咁架啦。杯麵成個西藏都有，除非你咀刁到一定要made in japan，否則一餐半餐食唔死既。
可以帶點chocolate，今次最受歡迎係pocky，餅乾可以不帶，冇人食的，香口膠，冇人食的，nuts都可以帶少少。都係一句，去得人地地方，勇敢D，試下食人地D野啦。
行程
今次係第1次去西藏，都好standard啦，9月去，林芝不適合，咪skip囉，第1次就去阿里又好似太激，咪下次先囉。既然如此，拉薩-->山南 -->珠峰 -->納木措，有山有湖有廟，已經係西藏遊基本盤，路線亦唔難規劃。
講到車，還有一樣野，download定多d歌落手機，大部份車都有藍牙的，你手機有歌就可以播，如果唔係，司機就會日日夜夜播藏歌印度歌尼泊爾歌，頭一兩日就過癮，之後十幾日如是，人都顛。
幾個人一齊夾個行程，好易會順得哥情失嫂意，西藏可以睇山睇水睇星睇廟，可以在八廓街曬一日太陽，可以在納木措對住個湖一晚，有人喜愛行幾個鐘寺廟，有人愛爬山涉水，人人喜好不同，如不懂互相體諒，倒不如中途散band，免得旅程最後一日互數不是。
好彩我地團友個個「順德人」。冇高反，西藏，真係點玩都得！！！
去得西藏，好好享受當地文化生活，毋需太執著乜野唔記得帶乜野帶得太少。我地5條港產麻甩15日西藏經驗，可以咁講除咗$之外，其他物資真係唔需要過份緊張。在西藏，請把港男港女性格暫且拋低，如果你想在西藏過港式生活，怕污穢怕累怕上車落車怕凍又怕熱，倒不如屋企掛張大大張既布達拉宮poster，求其影自拍放上FB當去過算了。
日期 - 10-15 Sept 2015
隊友 -
Eugene (隊長、CFO)、Steven (發起人)、Kelvin、Ronan、Rudy - 平均年齡差不多40的5條麻甩佬，其中四人已有家室，可見今次本條老命的洗滌心靈之旅是何等神聖和偉大。
併車女 - 來自廣州工作的Crystal 及蘇州的 Liza。
司機 - 格桑
一架9人商務車，8個人，N件行李，起程。
到達拉薩機場
<![if !vml]>
<![endif]>
到埗指定動作：機場名做background大合照。
因為有高反的憂慮，落機一剎那都有點驚，一路謹記blogger同去過既朋友的忠告：唔好急、慢行、唔好興奮、唔好食煙。
實際上，可能係我地幾個落機唔覺有頭痛，我地心情都異常興奮，莫講話龜速，我地要周圍撲個好位影大合照，又要將個喼推來推去，又要搵個司機，動作未至於極速都起碼是快速。至於煲煙，幾個鐘飛機，睬你都傻，即刻點火。
基本上，所有到西藏第一刻不應該做的事，我們都做齊。
kelvin --> Steven --> Eugene --> Ronan --> Rudy
白色條巾叫哈達，意思祝賀和敬意。基本上，同個司機相認後佢都會每人送一條。
扎西曲塔酒店和八廓街
西藏第一間入住酒店叫扎西曲塔，網上幾出名的。酒店房尚算企理，只係浴室較細，洗手盆同個屎塔距離只有一尺，而這個一尺位頭頂就係沖涼花灑，沖涼唔方便。(註：好多人話頭幾日唔好沖涼驚有高反，傻的嗎，酒店有得沖，日日都沖啦)。
扎西曲搭好有藏式風味，佈置特別，酒店職員全部都係靚仔靚女，好鬼親切。美中不足是房間隔音唔好，夜晚有人行過講野會嘈。
不過唔緊要，呢間酒店還是重點推介，原因係中間個lobby你坐一陣，酒店其他住客就會來搭訕，想拼車、去過邊度靚邊度好玩、邊個高反，好多資訊，我地找來的兩個併車女都是酒店識的。唔係講笑，成間酒店好有家的感覺。天台可以遠眺布達拉宮，我地呢D冇高反既，行幾層樓梯完全冇問題，自不然一有時間就上天台，或樓下lobby睇女，睇啱既順口叫佢出去飲杯野，大家抱住交換資訊，談談心得，呢度識朋友冇難度。
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
關於拼車，可能今年尼泊爾地震，西藏遊客少，所以不少人有併車困難。而且好多local 拼車團的收費是平，但去景點停留不夠一個鐘，其餘全程帶你去「鳩烏」，甚為老點，所以併車並非如網上講得咁易。我地架車因為可以坐多兩個人，都不知幾受併車客的歡迎，最後Crystal同Liza就join了我們餘下行程。
去西藏，如果你對生活質素好有要求的話，拉薩有幾千一晚的Shangri la同St Regis。不過，這些5星級酒店離八廓街遠又唔方便，唔好玩。在拉薩，酒店一定要：1. 近八廓街，由日到夜都多野睇。2.酒店職員肯幫手，最緊要係有問必答，因為西藏唔係話一坐低就乜都自己攪到，酒店肯幫手慳時間之餘又慳自己心力。我地個珠峰邊防證就係靠酒店幫，咁當然要俾$啦。3. 有藏式風格，最好一入門口就有陣酥油茶味，我地去西藏就係想感受藏，走去幾千銀住5星期級感受莞筦式酒店管理，把鬼咩。
<![if !vml]>
<![endif]>
<![if !vml]>
<![endif]>
八廓街是超正的。拉薩的中心點，雖然鋪頭commerical味濃，但宗教兩字，在八廓街是無孔不入，每秒都感受得到，第一次親眼見到三叩九拜，重要係一堆一堆人在街上拜，一拜輕則幾個鐘，重則由阿里屋企一路拜到入大昭寺，要幾個月時間，你不得不佩服其毅力。(有一點要留意，行八廓街要順時針方向，如果唔係成條街D人以為你玩野，，如果唔知何謂順時針，跟住路人方向行實冇錯。)
<![if !vml]>
<![endif]>
<![if !vml]>
<![endif]>
五體投地，唔好以為只有老藏民或住農村藏民會做。不少年青人，不怕成身污穢，成面黑晒，就算落大雨都照樣五體投地，睇見佢地拜到黑卒卒，真係心痛死。
關於影相，其實藏民又唔係落後到未見過相機，唔會蠢到以為相機會攝魂。只要唔好兜口兜面近距離影，用中長鏡影一般都冇問題。
反為D解放軍就好緊張有人影佢地，怕被尋仇掛。
<![if !vml]>
<![endif]>
<![if !vml]>
<![endif]>
布達拉宮
<![if !vml]>
<![endif]>
唔駛講野，無論早午晚，春夏秋冬，布達拉宮都係咁出色，簡直係驚天地泣鬼神，聞名不如見面。聽講布達拉宮兩年後會永久封館，取之是一個copy and paste布達拉宮 v2.0，唔想去翻版貨的話，記得要快。
布達拉宮每日賣自由行遊客既飛都有上限，重要今日買飛聽日入場，為免耽誤行程，第2日晨早6點，我、Kelvin、Rudy就去排隊買預售券。由於尋日到拉薩時熱到飛起，萬料不到第2朝係咁凍既，估計得幾度，著唔夠衫，又大風，又要等成3個鐘開門，都咪話唔痛苦，好彩我地靚仔，無無聊聊同排前面的一對男女傾計，傾下凍下時間好快過。亦好彩咁早去排隊，先知原來布達拉宮日出時係咁靚的。
如果唔想排隊又想入場，有D團體飛可以買，不過有D好似都係購物團，參觀完就預咗被斬到一頸血，醒少少都知世上邊有不勞而獲吖。
<![if !vml]>
<![endif]>
<![if !vml]>
<![endif]>
<![if !vml]>
<![endif]>
我地睇布達拉宮紅色那部份，原來唔係磚頭石屎，係用一枝枝竹籤排成的，可見幾考功夫。而世上最深既廁所(舊屎屙落去足足要跌落有十幾層樓深)，可能因為國內人喜歡隨街屙，所以只作參觀不作試用。
如果對藏傳佛教有興趣的人士，不妨請個導遊，如果唔係你入到去除左嘩嘩聲好靚啊好勁啊之外，D佛像邊個打邊個你都唔識分，隨時拜錯大佬。如果唔想駛$請導遊，可以扮晒野跟人行黐其他導遊，當然你聽唔聽得明閣下自理。不過據我經驗，因為地方淺窄，就算人地個導遊知道你係菠蘿雞，都唔會鬧你的。
好多人話上宮條樓梯令人放棄，傻啦，世上無難事，慢慢行實到既。隊友 Steven開頭都話驚行唔到，最後邊行邊影邊吹水，咪話咁快到頂。都係一句，冇高反，你去邊都得。
記住宮內影相個人收費1500大元，好想偷影達賴喇嘛個睡房，因為有一份似曾相見又有餘韻的依稀感覺，可能我前幾世就係訓嗰張床未定。如果想買宮內佛像D相留念，出到exit有本書，好似兩舊水，唔係齊晒所有佛像既相，但大部份都有既。
布達拉宮實在太正，非筆默所能形容，唔去係你損失。而家宮內只係開放一條路線，都行成個幾鐘，以前全宮開放的年代，難怪有遊客會入宮後盪失路了。
<![if !vml]>
<![endif]>
大昭寺
<![if !vml]>
<![endif]>
<![if !vml]>
<![endif]>
參觀地位崇高的大昭寺又係拉薩指定動作，唔去過都唔知藏民原來係咁叠馬，裡面人頭擁擁，係去過幾間寺最多人的一間。同樣寺內不准影相，關於這點，要解釋一下，寺內唔准影相，原因有幾個：1.人太多，個個企定定影相最後攪到迪士尼咁樣冇人想。2.影相唔係唔得，俾$任你影。3.基於政治原因，以前西藏未有2008事件前，好多寺都可以影相的，而家保安嚴過911，影相驚你係恐怖份子影定D恐襲路線圖。
唔准影相，並不是起於怕閃光燈對文物的破壞，絕大部份都係佛像唔係圖畫，閃燈影響微。而尊重宗教這點，其實藏人並不抗拒外地人影佛寺的，好等相片在西藏以外留存宣揚佛教。而我地偷拍，原因好簡單：政府話唔得，我地就偷，吹咩。 (不過話晒係偷拍，記住熄咗個快門聲
<![if !vml]>
<![endif]>
<![if !vml]>
<![endif]>
八廓街附近有間小昭寺，冇乜野睇的，原本唔打算去。不過小昭寺附近有間華清池，dup骨的，我地比較有興趣。因為順路所以豪20大元入了小昭寺，一如所料，可以不去，去到算是到此一遊罷了。
華清池方面，大大間，酒店格，純dup骨，人唔多，我dup腳130，其他人dup身就190咁上下，手勢不錯，可以一試。幫我dup腳的女子來自四川，順便又八一八，佢來了拉薩半年，頭一個月高反到行唔到死咁滯，要返四川休息再來先無事。佢話而家拉薩人口一半係四川人，都幾恐佈，不過呢D嚇唔到我地香港人既，香港咪又係不停比人溝淡.....
佢地四川去拉薩打工既，對藏毫無感情，只是賺錢，有好多人未去過布達拉宮大昭寺，做遊客生意賣藏產品的，更多是對藏文化毫無認識，只會copycat。這些，我們香港人早就領會過了。
Lobby坐一陣，就有不少人會過來問呢樣問嗰樣。D人唔知重以為我地住西藏已經幾十年。
竟然見到model影相
<![if !vml]>
<![endif]>
色拉寺
<![if !vml]>
<![endif]>
色拉寺，睇既係辯經，你唔知佢地辯緊乜，但見佢地七情上面，可能係笑緊我地呢D俾錢入去睇佢地辯經既傻佬。辯經既特點係一路講，一路拍手，唔係開心拍手，係好似領悟到D野拍一下手代表「明晒」，又好似係拍手示意俾對手知，「你明唔明啊」咁樣。
反正你唔知佢講乜，佢又唔會理你，我地坐旁邊既咪最多幫佢地配音囉。
<![if !vml]>
<![endif]>
虛擬配音：我話你啊，得粒豆咁細啊，你明唔明啊！
羊湖
<![if !vml]>
<![endif]>
拉薩3日，係時候衝出去了。第1站，羊湖。經過婉轉的山路，羊湖就在眼前，三大聖湖之一，名不虛傳，靚到爆。藍色的湖水，比天更藍。
我們在3個不同地點看羊湖，非常滿足。其中去到第2個點有小插曲，個司機停車後，我地當然飛奔出去啦，冇耐個司機叫我地上車走，咁當然唔夠喉啦，Crystal同Liza睬佢有味。原來，司機知道前面將整路，如果我地唔馬上上車，前面就會封路去唔到第3個點，啊司機有道理但又講得唔清唔楚，禮貌欠奉。雖然我地最後都上得切車去到第3個點，但係個司機就係咁依依哦哦話兩個女仔唔合作，成日跑來跑去。
<![if !vml]>
<![endif]>
<![if !vml]>
<![endif]>
<![if !vml]>
<![endif]>
去羊湖，例必經過崗巴拉山口，由高處下望，境色怡人，是遊客必到之地。既然如此，自然有生意，打扮得靚靚，純過小綿羊的藏獒影相，盛惠10皮。掛經幡、去廁所，通通要$。
藏獒除咗多口水之外，其實都俾人養到純晒，打不還手罵不還口。
成個西藏周圍都見到這些一座座用石疊成的祭壇，叫瑪尼堆，又叫神堆。
隨風飄的經幡，無論地勢幾險要，藏民都是有辦法掛上去的。顏色鮮豔，有經文，有佛像，有吉祥圖案，總之同轉經輪一樣，風吹得越大，經幡郁得越快，經文被諗的次數就越多。信不信由你。
<![if !vml]>
<![endif]>
<![if !vml]>
<![endif]>
<![if !vml]>
<![endif]>
卡若拉冰川
<![if !vml]>
<![endif]>
唔行林芝線，自然冇去米堆冰川，順路就去卡若拉冰川補返數，近距離接觸冰川並非第一次，但係睇到卡若拉冰川有幾個感受：
1. 冰川右邊有個大冰塊脫落，是1996年拍紅河谷時，個PK導演馮小甯為了拍雪崩用炸藥炸的，這個大缺口，永遠無法癒合。
2. 冰川個邊太近公路，多車多遊客，造成個冰川上白下灰。
3. 本來睇冰川最好位置係下面個停車場，但係俾土豪霸咗，要去就要俾幾舊水停車費。
<![if !vml]>
<![endif]>
同其它景點一樣，一停車就大批sales衝埋來sell野，大部份都係「珍品」，例如大大舊水晶、有蝎子喺裡面的大大舊琥珀、大大隻恐龍蛋、大大粒天珠。價錢又係叫到天咁高，等你還價。還幾多？打個兩折咁上下啦。
隊友Kelvin見到有舊橙色水晶好鐘意，開價800，還價300，sales say no，再還價150，再say no，最後100交易，兼同價買多舊紫晶。
<![if !vml]>
<![endif]>
早上7:30的布達拉宮，天與地的色彩對比強烈
<![if !vml]>
<![endif]>
朋必 - 聽說是日喀則特產，未食過唔算去過日喀則，不過好奇怪，在日喀則市問極人都話未聽過，冇可能係國語發音問題架，因為係國語人問嗰喎....奇。
好彩之後去珠峰路上有間shop仔有，即刻買個試一試，味道少少咸，清淡，未至於一食難忘，可入口。
Book車時最擔心是商務車行唔行到山路，因為珠峰山路多，髮夾灣一個接一個，當時西藏四驅車據聞已唔續牌book唔到，bloggers又成日話見到商務車頂硬上珠峰最終死火要掉頭落山。不停wechat問司機佢架車掂唔掂，咁佢例牌話no problem啦，惟有信佢。去到，原來珠峰條路已鋪得靚靚，乜車都行到。
九曲十三灣，全部泊油路，坐幾粒鐘車個屎忽一D都唔痛。
<![if !vml]>
<![endif]>
八廓街shopping基本上所有紀念品都買得到，不過講價就難免。其實如果識買，一定等夜晚關鋪，地攤出場之時，價錢平，唔多人，D攤主女人居多，我地靚仔易講價，一般一條大大抽頸鍊，由幾舊講到廿皮有交易。
等到鳩都縮，終於買完飛，行返酒店，去既時候打的5分鐘，行返去要成粒鐘，唔係行得慢，係途中有間大郵局，因Steven要寄明信片，入定去幫佢探路，有咁既隊友，實在唔話得。
其它sales見到咁既水晶都有人要兩舊，真係水魚上雪山，凍住來劏，就一湧而上係咁叫Kelvin買呢D買嗰D，當時我已經走咗上旁邊一個山頂影相，向下望，竟然係見到成堆人攞住D貨係咁追住Kelvin，而Kelvin就在成5000米以上高原極速狂奔閃避。從高下望，冰川狂奔，此情此境，實在難忘。
你可能會問，又爬山又狂奔，傻的嗎。咁都係嗰句：冇高反，你想點玩都得。
<![if !vml]>
<![endif]>
<![if !vml]>
<![endif]>
卡若拉冰川之後一般都會去埋斯米拉神山，睇滿拉水庫，D水係綠綠地色的，同羊湖的藍色分別好大。嗰度D經幡係一大束一大束的，成個經幡陣咁，D人話行過唔好踩人地D經幡，不過sorry，除非識飛，如果唔係幾難踩唔到。
滿拉水庫其中一個特色就係擒上欄杆跳落地影相，一定要連拍，無圖無真相，影相唔狂跳，點證明自己冇高反。
斯米拉山幾大風的，有個賣經幡的女孩幾cute的，信唔信都好，不妨幫趁下。
雍布拉康
<![if !vml]>
<![endif]>
<![if !vml]>
<![endif]>
<![if !vml]>
<![endif]>
誠意推介：景靚、好玩又刺激。
靚皆因個寺高高在上，由上向下或由下向上望，都咁有特色。
好玩是可以騎馬上落山，來回50大元，個馬夫會一路行一路唱歌。不過唔好俾架相機佢幫你影相，佢地影D相張張都冇頭的。
刺激係後面個經幡山，上去條路係窄窄石路，行山仗好重要。
小插曲：雍布拉康撞到一班香港年青人，1男4女加2個併車少女，佢地上到山高歌一曲側田，可惜我地冇人識唱，如果唔係一定一齊唱到直至俾喇嘛趕落山。
札什倫布寺
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
兩個字：好大。去日喀則必到，側邊有條街D餐館唔錯的，好好食。旁邊大量紀念品同古董店，Ronan最想買藏刀，不過全部都係工藝品兼把把都大大碌，點攞上機？店又唔肯幫手寄返香港，最後得個睇字。
西藏寺內有個特色，就係D樓梯係70度角上落的，扶手一係就搖搖欲墜既爛木，一係就得一條繩，有個阿婆阿公上樓梯跣腳，我喺佢地下面唔頂住佢地睇怕會攪出人命，我一個頂兩個條腰就咁擦損咗。(有大塊膠布，yeah。)
佢地唔識國語，係咁用藏文多謝我(我估係掛)，當正我係活佛再世。
札什倫布寺另一看點就是文化大革命對文化的破壞，側邊幅相隱約見到D擦去既字就是其例證。
珠峰大本營
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
神山啊神山，幾驚你唔肯見我。
珠峰的奧妙之處係，你以為雲多霧多會緣慳一面，點知一轉眼，D雲D霧會突然冇晒，真係只要有信心，珠峰都同你開香檳！
能夠見到地球第3極，個內心呢，係有點激動的。可惜今次見唔到金頂。下次，下次一定會見到。
去到1號大本營，就係當晚要住既營地，有小巴上去2號大本營，值得一去。二號大本營有一個小山丘，無論如何都要爬上去，見到好多人戴晒氧氣都要行，冇點你的。
預備定一枝粗marker寫願望在石頭上，感覺上願望是會成真的。當然，如果冇乜願望，求其寫個xxx到此一遊都可以。
個小山丘另一邊係一塊好大的石地，有人執石仔砌字，我地就有咁遠行咁遠，直至見到一條河。聽說飲河水會消除高反，一路上山都有人裝河水飲，如果當日在下游有飲河水的人士要對你地說聲sorry了，因為我地在河的上游，情不自禁下，灑下了我們的聖水......
上珠峰只有一個景點，但跑來跑去已足夠玩你一日半日。好多人話，冒高反危險去遠望珠峰唔值得，當然我都知能夠爬上珠峰頂就最過癮，不過作為凡人一名，能遠遠感受到珠峰的魅力，已夫復何求了。
大本營住宿有幾點要攪清楚：
1.以前2號營地是可以住人的，不過因為尼泊爾地震，已不可在此紮營。3號營地是解放軍的，你都唔想去住吧。
2.營地如果你唔想同陌生人share，可以包起成個。如果當日遊客多驚同人併營會有危險，建議包營。
3.營裡面凍定熱呢？咁講，夜晚營外好大風，約得0度，我地訓營冇用自己睡袋，我就越訓越熱一件件咁除，但同樣有人話覺得凍。但總括，我地個個都訓到豬咁樣，冇話失眠。
4.個個營都有廚房，唔驚你餓，只驚你冇錢。
5.大本營個公廁係非人類可接近的地方，見過唔少人一開門就嘔。
6.大小二便，最方便就係....露天，唔駛怕醜，你唔屙大把人屙。所以女仔去大本營如果唔將世俗拋開，是有點困難的。
7.營內氣氛其實是一流，個藏民女營主除了不時會sell你買佢D鏈啊藏刀之外，都好nice的。
8.電筒要跟身，夜晚營外是伸手不見五指的，如果夜麻麻要搵野，堅係唔好意思開營燈囉。
小插曲，大件事：
話說Ronan唔見銀包，大獲，錢事少，回鄉証事大，沿路上山不停咁check証，如果唔見咗恐防我地一齊要陪佢移民珠峰。咁無論如何都要搵返個銀包，幾條友個個柯南上身，精確分析下，有3個可能性：1.銀包還在營內；2.銀包跌在營外；3.有人偷咗。(廢話，仲有第4種可能嗎？)
1.在營內 - 個營唔大，又冇乜傢俬，要搵返唔難。揭開床下底望望，唔揭由自可，一揭大獲，嗰D珠峰千年沙塵飛晒出來，正好被小弟一野吸晒，之後幾日慘受鼻敏感之苦。
2.在營外 - 點搵啊，黑麻麻，只能盡盡人事，記唔記得在雍布拉康撞到班香港年青人，咁橋珠峰又見到佢地，佢地好幫手喺營外搵，但都係大海撈針一樣，乜都冇。
3.被偷 - 通常，偷完銀包攞錢就掉，而掉銀包最傳統地方就係廁所。Fine，我地但求搵返個回鄉証，惟有死士去廁所望一望，個死士，就係我。包好成塊面，保證唔會抖到氣，用最大勇氣開廁所門，電筒一照成地屎，有屎坑4個，屎量已堆積如山，係咁咦望一望冇銀包即閃。睇完男廁睇女廁，無所獲。(老實，如果屎坑內真係發現銀包，我係絕對唔會執的，只會叫Ronan自己去執)
搵咗好耐，成個營反轉咁滯，心水清既Rudy出手了，佢用一個極度咸濕既手法由上到下摸住Ronan隻大腿，正當我地個個奇怪呢D時候都想攪野，原來個銀包就在Ronan褲腳。條友原來之前買完野，將銀包放褲袋，點知佢著咗兩條褲，個銀包就攝錯位攝喺褲同褲之間.....
銀包失而復得，安樂晒，我就鼻敏感到爆鼻，得著是之後Ronan請食石鍋雞，以及小弟可以前無古人地對個珠峰公廁作咁認真既視察。
搵到成12點咁滯，set好鬧鐘4點出去影星。
到朝早，珠峰還是羞花遮面，好不掃興。正想上車走人之際，突然，珠峰現身講bye bye，不枉此行也。
回程時唔好唔記得影珠峰山脈，縱使珠峰是永遠的主角，但其他配角連在一起，白色一遍連綿千里，成件事先會完美。
註：大本營執銀包之時，有個香港妹妹仔俾咗個暖手包我，感覺份外窩心。
納木措
如何形容納木措：震撼。成5000米高原有咁大個湖咁大片草地，你會好想同淺水灣講「你去食屎啦」。
<![if !vml]>
<![endif]>
<![if !vml]>
<![endif]>
<![if !vml]>
<![endif]>
無論日出或日落，都一樣咁正。要睇日落，見山就上山吧，上山途中有D欄杆唔俾跨過的，咪理佢，照跨過。日落時間約8點，要上山就提早。
日出，最好地點係白塔附近，咪鬼信iphone個指南針，佢指個東面有偏差的，日出時間約7點半，早D去霸個靚位。
D湖水清到爆，記住唔好洗腳，D藏人見到會郁你，可以洗臉，D湖水有少少咸味，因為N年前成個西藏係海底來的。
納木措好大好靚，唔覺意行下行下，可以行到好遠。Rudy就係攞住條room key行到好遠睇日出，攪到我同Kelvin冇key入房。，
<![if !vml]>
<![endif]>
可以騎牛，影相30，騎住隻牛行一行落水40，團購有價講的。
騎馬就40+10影相，騎馬你當係搭的士吧啦。
好多人在西藏途中見氂牛就影相，其實唔駛的，納木措D牛啊羊啊係一群群的，影到你飽。
<![if !vml]>
<![endif]>
羊年轉湖，一早就會見到好多人圍住D山啊石啊塔啊係咁轉，照舊唔好以為自己好有型逆住人群行，要順時針方向。
納木措有D山洞有古代璧畫的，一路行入去除左圾垃之外，重會見到藏民喺裡面野餐，個感覺好突兀。
我地住既係羊賓館，約120大元一個人，相當唔錯，有電毯，房間落地玻璃，離夫妻石近，最緊要係夜晚聽唔到狗吠。不過個廁所更有風味，基本上係露天，門只係遮到半邊身，一路屙一路可以同路過途人打招呼，如果開大，風味盎然。
如果再有機會去納木措，一定會住兩晚，其中一日剩係對住個湖，乜都唔諗，好快會成仙。聽講有佛緣的話，去納木措湖邊行下行下一個浪會沖粒無價寶 - 天珠，10眼天珠真既話值成億架。
初到納木措，第一眼的震撼同廣闊既大地加埋個藍藍藍湖，好容易就掉以輕心不停跑來跑去，一下唔覺意好易有高反。上山睇日落日出係超值的，不過唔好夾硬來，所以納木措最好放在行程後段。
And，無論幾眼訓，都要3點鐘出去睇星，D星多過你D頭皮。夜晚的納木措，湖水拍岸，舉頭滿是繁星，伸手又不見五指，咁既環境，無論溝仔或溝女，冇得輸。如果同行隊友中有一男一女忽然消失於漆黑中，成個鐘先出現返，大家成年人，唔好問咁多囉。
小插曲，大收獲
話說一大朝就唔見咗Rudy，原來是咁的：佢一個人行下行下，有個藏民熱情地向佢揮手，可能貪Rudy靚仔重請佢去佢屋企食早餐，能夠體驗地道藏民家居，Rudy當然應承。入到屋，食食下，藏民話對Rudy手中隻錶好有興趣，重樂意割愛用佢條家傳蜜蠟手鏈交換，善良的Rudy見隻錶又唔係成日戴，量海拔度溫度呢D功能對佢又冇乜用，見到人地條家傳之寶D蜜蠟黃咁咁又大大粒，冇乜考慮之下就deal了。港藏交易平台正式成立。
Rudy隻錶值2000左右，而條蜜蠟手鏈，經專家鑑定約值5草野。不過心意既野並不能以價值衡量，有冇蝕底亦非我們旁觀者能為Rudy所聲討，不過有一樣肯定的是：個藏民嗰朝就大收獲囉。
其它去過既地方例如桑耶寺、哲蚌寺、楚布寺、江孜城堡等，你地自己上網睇好過我寫啦。睇寺廟有幾個特別角度出發：
1.文化大革命的侵害性
2.每個廟堂每個彿像、每條柱，總之有位可以攝到錢既地方都會俾D善信攝滿晒紙幣，大多數係1蚊，偶然會有100。唔係叫你去執，無謂為少少錢去得罪神靈，係叫你地去睇喇嘛點樣將一大堆錢由個佛像掃落地，然後幾個喇嘛數完之後一綑綑綁好。我們稱這種喇嘛為 counting lama。
3.如果買佛鏈可以到寺內買，一般價錢會平DD，而且重有即場開光服務，好簡單，賣野個喇嘛會揸住你想買條鏈轉幾轉，口中念念有詞，開光就會完成。如果覺得兒戲，又可以買有開光証既產品。
都係咁講啦，入廟拜神，認識多D藏傳佛教，信唔信都好，冇壞既，睇既時候起碼有D feel先啦。
<![if !vml]>
<![endif]>
冒生命危險影的：楚布寺文革前、文革中、文革後的情況。可以話係成個寺移平再重建咁滯。
酒店會有熱水煲，不過係會有陣鐵鏽味，翻煲幾次都消唔去。唔緊要啦，我地香港人飲慣開鉛水，區區鐵鏽咪當補品囉。
影相
<![if !vml]>
<![endif]>
<![if !vml]>
<![endif]>
<![if !vml]>
<![endif]>
去西藏基本上有三種相係必定會影的：
1.坐或訓馬路 -- 佔中時已影過不少訓馬路相，冇乜感覺。
2.截順風車 -- 咪玩啦，大陸有9條命都唔敢截順風車啦，唔好咁假好唔好。
3.跳起 -- 除了表示冇高反的即時生命危險外，最多話到俾人聽你唔係跛既。
<![if !vml]>
<![endif]>
<![if !vml]>
<![endif]>
<![if !vml]>
<![endif]>
<![if !vml]>
<![endif]>
無論你幾唔想起身，去到珠峰、納木措、羊八井呢D地方，真係寧願上車先訓，都唔好唔出去影星，無光害睇星重要係高原地方，正既程度真係唔識形容。小弟都係攝影新手，臨出發前先上網睇下點影星軌，可惜，合成星軌相失敗了，因為大風，D相叠唔埋一齊，銀河倒是試下試下叫做影到D野。
影星唔好懶，唔好慳，好既腳架好重要，我就係自己個腳架雞，問Rudy借，第1次用，又黑麻麻又大風，一唔小心跌崩咗個鏡，修理要成3000銀，肉都赤。幾十蚊快門線豪俾佢啦，用手機做remote好煩的。影星影景買個正既wide angle真係冇得輸，哲蚌寺時曾經有位香港女士問我點樣可以一張相影晒成個view，望一望，佢個鏡只係天涯鏡，wide極有限，我都係叫佢用iphone用pano function算吧啦。
開閃燈影夜景係會俾人笑的，唔想下下出腳架，用大光圈啦，前提係唔好高反到手震囉。如果攪到個look 好pro咁去布達拉宮廣場影夜景，會有好多不同種類的囡囡走埋來的，唔係叫你影相，係知你係遊客問你去過邊度玩。
15日西藏遊又點可以一個blog寫得晒，每間住過既酒店、食過既飯店、遇到既人和事，寫齊晒出書都得。如果加埋朝夕相對的隊友的旅途點滴 - 毒蘋果、澤當紅燈區、莞味濃的日喀則、併車女變護士小姐、高原舌戰PK司機、無懼缺氧執一劑，全部都是拍案叫絕，過癮非常的TOPIC，要寫邊度寫得晒。
最馨竹難書的，莫過於是對藏民和西藏的感受，一個原本與世無爭的世界，純樸的宗教氛圍，因為要漢化、要攪經濟要攪指標，處處都是垃圾、金鋪、假貨，藏民是善良的，這點毋庸置疑，但被非藏人的商業化活動所污蔑了的名聲，就算是簡簡單單不含任何政治取態的遊客，也輕易感受得到。
還藏人的一個寧靜和純樸，比起開發旅遊攪活經濟，比起柏油路，比起骨場紅燈區，相信去過西藏的人也不難作出選擇。感恩今次旅程沒有高反，不過黑心講句，寧願去西藏遊客都有高反，機場滿地都是因為高反而死的屍骸，要是這樣才能令西藏復元，那就讓高反肆虐吧。
後話